హార్ట్ టు హార్ట్...

తరాల తేడా గుర్తిస్తున్నారా?

2010-11-10T23:05:00.000-08:00

ఈ కాలం జంటల్లో సాధారణంగా కన్పిస్తున్న అంశం ఏ ఒక్కరూ వివాహానంతర జీవితం గురించి ఆలోచించడం లేదు. తమ సంసారం బాగుండాలంటే ఏం చేయాలి అనుకోవడం లేదు.దీనికి కారణం కొంత, వివాహ వ్యవస్థలో వస్తున్నా మార్పుల్ని సరిగా అర్ధం చేసుకోకపోవడమే.ఈ కాలపు యువత ఆధునిక జీవితానికి అలవాటు పడుతోంది.అయినా పెళ్లి దగ్గరికొచ్చేసరికి రకరకాల కారణాల వాళ్ళ పెద్దవారిమీదే ఆధార పడుతున్నారు.దాంతో వారి అభిరుచులకు తగిన భాగస్వాములను పొందలేకపోతున్నారు.మన అమ్మానాన్నలు బాగానే ఉన్నారుకదా మనమూ అలాగే ఉండచ్చు అనుకుంటారు.కానీ పెళ్ళయిన వెంటనే గొడవలు..ఎందుకిలా ? లెక్క eక్కడ తప్పుతోందిఅంటే..మన అమ్మానాన్నల తరానికి ,ఇప్పటి తరానికి చాలా తేడా ఉంది.ఇది గుర్తిన్చానంతకాలం సమస్యలు వస్తూనే ఉంటాయి.కొంచెం తీరిక చేసుకుని పెళ్ళికి ముందు మాట్లాడుకుంటే చాలా సమస్యలు దూరం చేసుకోవచ్చు.కొత్తగా ఉద్యోగంలో చేరినపుడు రాణించడానికి సమర్ధత ఎంత అవసరమో, ఎలా పై అధికారుల మెప్పు పొందాలని ప్రయత్నిస్తామో,అలాగే వివాహబందానికీ కృషి చెయ్యాలి.అంచేత...
-అబ్బాయి అమెరిక నుంచి వచ్చాడని,టైం లేదని హడావుడిగా పెళ్లి చెయ్యకూడదు.జీవితాంతం కలిసి ఉండాల్సిన బంధానికి కాస్త సమయం కేటాయిస్తే నష్టం లేదు.తల్లిదండ్రులే ఈ విషయంలో సహకరించాలి.అమ్మాయి,అబ్బాయి ఒకరినొకరు అర్ధం చేసుకునే సమయం ఇవ్వాలి.పెళ్లి అయిన ఆరునెలలకే విడాకులకు పరుగెత్తే కంటే, ముందు ఆరునెలలు ఒకరినొకరు అర్ధం చేసుకోవడం మంచిది.
- ఒకరిగురించి మరొకరు తెలుసుకోవడమే కాదు.వారి కుటుంబ నేపథ్యాలూ వివరించాలి.వెళ్లబోయే కుటుంబంలో ఎంతవకు ఇమదగలం,అందుకు ఎలాంటి కృషి చేయాలి అని తెలుసుకోవాలి.పుట్టింట్లో గారాబంగా పెరిగిన అమ్మాయిని ఉమ్మడి కుటుంబంలో ఇస్తే వచ్చే సమస్యలవంటివి(లేటుగా లేవడం,పూజలు,వంటలు రాకపోవడం...)నివారించవచ్చు.
-పెళ్లి నిర్ణయంలో తల్లిదండ్రుల జోక్యం చాలా తక్కువగా ఉండాలి.అయితే దీనికి ముందు తల్లిదండ్రులూ ప్రిపేర్ కావాలి. చాలా మంది తమ పిల్లల చదువు,దుస్తులు,నగల గురించి ఆలోచించినట్లు పెళ్లి,తర్వాతి జీవితం గురించి ఆలోచించడం లేదు.
- కొత్తగా పెళ్ళయిన వారు కనీసం రెండు సంవత్సరాలు ఇరువైపులా పెద్దలకు దూరంగా ఉండాలి.అప్పుడే ఇద్దరిమధ్య చక్కని స్నేహం పెరుగుతుంది.
-మనం చేసుకునేవారు చూడగానే అద్భుతం అనిపించకపోయినా పర్వాలేదు కానీ వారి సమక్షం అసౌకర్యంగా ఉండకూడదు.అలా అనిపిస్తే ముందే ఆలోచించాలి.

పెళ్ళిళ్ళు ఎవరు కుదర్చాలి?

2010-09-14T23:33:00.000-07:00

మన దేశంలో చాలా మంది పెళ్లి అనగానే నక్షత్రాలు,జాతకాలు,అని పరిగెడుతూ ఉంటారు.వందేల్లక్రితం ఎలా ఉందొ ఇప్పుడూ అంతే. ఈ విషయంలో మారలేకపోతున్నారు అటు తల్లిదండ్రులు,ఇటు పిల్లలు. ఇప్పటి తరం ఆలోచనలు,ఆశలు వేరు. నిజానికి వీరికి పెళ్లి విషయంలో సహాయం చేయాల్సింది కౌన్సిలర్లు.వారు ఇచ్చే సలహాలు ఎంతో ఉపయోగంగా ఉంటాయి.వాస్తవానికి ఇద్దరు వ్యక్తులు కలసి జీవించాల్సిన తరుణంలో వారి మధ్య అవగాహన,ఆసక్తుల కలయిక ముఖ్యం.అంతేగానీ నక్షత్రాలు,జాతకాలు కావు. పెళ్ళిళ్ళు స్వర్గంలో కాదు, భూమి మీదే కుదురుతాయని గ్రహించడం ఇక్కడ చాలా ముఖ్యం. ఒక సర్వే ప్రకారం ఇరవై శాతం పెళ్ళిళ్ళు విడాకులకు దారి తీస్తున్నాయి. లెక్కలకు అందనివీ చాలా ఉంటాయి.అందుకే పెళ్ళికి ముందే కాబోయే వధూవరులు కుటుంబ నిపుణులను సంప్రదించి సలహాలు తీసుకుంటే మంచిదని నిపుణులు సూచిస్తున్నారు.తద్వారా ముందే ఒకరి గురించి మరొకరు తెలుసుకోడమే కాక దానిని భవిష్యత్తుకు చక్కని బాటగా చేసుకుంటున్నారు.ఢిల్లీ లోని విమ్హన్స్ లో పనిచేసే సైకియాట్రిస్ట్ జితేంద్ర నాగ్పాల్ అభిప్రాయం ప్రకారం 'ఈ రోజుల్లో జీవితం చాలా వేగంగా,క్లిష్టంగా ఉంటోంది.దాంతో కుటుంబ సంస్కృతీ,వాతావరణం పిల్లలపై పెద్ద ప్రభావం చూపడం లేదు.దాంతో తమ భాగస్వామి నుంచి ఏమి కోరుకుంటున్నారో తెలియడం లేదు.మరోపక్క మహిళల పరిస్థితిలో పలు మార్పులు వచ్చాయి. బయట మహిళను తనతో సమంగా గౌరవించిన పురుషుడు ఇంట్లో మాత్రం అలాఒప్పుకోలేక పోతున్నాడు.ఇది మహిళలూ తట్టుకోలేకపోతున్నారు.ఈ పరిస్థితుల్లో వారికి మార్గదర్శనం చేసి,కుటుంబ జీవితం గురించి ఇద్దరికీ అవగాహన కలిగించాలి.అందుకు కుటుంబ నిపుణులే సమర్ధులు '.
ప్రీ మారిటల్ కౌన్సిల్లింగ్ ద్వార కుటుంబ జీవితానికి సంబంధించిన ఎన్నో విషయాలు తెలుసుకొని,సందేహాలు నివృత్తి చేసుకోవచ్చు.కొన్నిసార్లు తల్లిదండ్రులకి పిల్లల అభిప్రాయాలు తెలియక పోవచ్చు.అలాంటపుడు కౌన్సిలింగ్ సహాయపడుతుంది.కుటుంబాల్లో ఉండే సంప్రదాయాలు,ఆచారాలు,అలవాట్లు,ఆర్ధిక విషయాలు,సాంఘిక విలువలు, కుటుంబ సభ్యుల పాత్ర,...ఇలా వీటిలో తమకు సరిపడేవి,సరిపదనివి ముందే విస్లేశించుకునే అవకాసం దొరుకుతుంది.మానసికంగా,శారీరకంగా సిద్ధామో కాదో తెలుసుకోవచ్చు.అయితే ప్రస్తుతం అయిదు శాతం మాత్రమె ఈ విషయంలో నిపుణులను సంప్రదిస్తున్నారు.అదికూడా నగర ప్రాంతాల్లో. పల్లెలు,చిన్న టౌన్లలో చాలా మారాలి.అప్పుడు విడాకుల శాతం తగ్గుతుంది.
ప్రేమలో పడటం సులభమే.కాని కడదాకా ఆ ప్రేమ నిలవడమే కష్టం.మనం చదివే పాఠాల్లో ఎక్కడైనా కుటుంబ సంబంధాలు విజయవంతంగా ఎలా నిర్వర్తిన్చాలో ఉంటుందా?ఉండదు. అలాంటపుడు కుటుంబ నిపుణులు మనకు మార్గదర్శనం చేయగలరు.అందుకే తల్లిదండ్రులు పిల్లలకు పెళ్ళికి ముందు కౌన్సిలింగ్ చేయించడం అవసరం అంటున్నారు ఈ రంగంలో నిపుణులు.ఇప్పుడు అర్ధం అయిందా పెళ్ళిళ్ళు ఎవరు కుదర్చాలో?

పెద్దల మాట

2010-08-31T00:27:00.000-07:00

నా ఫ్రెండ్ అరుణ మంచి కొటేషన్స్ పంపిస్తారు. ఎన్నో అనుభవాలు కలిగిన కొందరు పెద్దలు ఏం చెప్తున్నారో చూద్దాం.
'నీ ఉద్యోగాన్ని ప్రేమించు.కానీ యాజమాన్యాన్ని ప్రేమించకు.ఎందుకంటే, ఏ నిమిషంలోనైనా నిన్ను ప్రేమించడంలేదని చెప్పే అవకాసం ఉంది'. -డా.అబ్దుల్ కలాం.
'విజయం సాధించేందుకు కావలసిన మూడు అంశాలు -ఇతరులకన్న ఎక్కువ నేర్చుకోవడం,ఎక్కువ పని చేయడం,తక్కువ ఆశించడం '-విలియం షేక్స్పియర్
'ఒక రోజంతా పనిచేశాక, ఏ సమస్యలూ ఎదురు కాలేదంటే,నువ్వు సరయిన దారిలో వెళ్ళడం లేదని అర్ధం'.-స్వామి వివేకానంద
'జీవితంలో దెబ్బ తీయకూడని అంశాలు-నమ్మకం,వాగ్దానం,అనుబంధం,అనురాగం. ఎందుకంటే ఈ నాలుగూ దెబ్బతింటే కలిగే బాధ తట్టుకోవడం కష్టం'
'విజయం అంటే మొదటి స్థానంలో నిలవడమే కాదు, గతంలో కన్నా బాగా కృషి చేసావని కూడా అర్ధం'.-బోనీ బ్లైర్
'నీకు నిజంగా మనశ్శాంతి కావాలంటే, నీ స్నేహితులతో కాక,శత్రువులతో మాట్లాడు '-మదర్ తెరెసా
'కల అంటే నిద్రలో చూసేది కాదు,నిన్ను నిడురపోకుండా చేసేది ' డా.అబ్దుల్ కలాం
'ఎవరికైనా సరే,నీ గురించి తెలియజేయాలని ప్రయత్నించకు.ఎందుకంటే, నిన్ను ఇష్టపదేవారికి అది అవసరం లేదు.ఇష్టపడని వారికి ఎంత చెప్పినా నమ్మరు'-ఆస్కార్ వైల్డ్
'నాకు నాతోనే తప్ప వేరే ఎవరితోనూ పోటీ లేదు.ఇంతకు ముందు విజయాన్ని అధిగామించాలన్నదే నా లక్ష్యం' -బిల్ గేట్స్
'ఇతరులను,వారి మంచిచెడులను పరిశీలిస్తూ ఉంటె, వారిని అభిమానించడానికి సమయం మిగలదు'-మదర్ తెరెసా
'నువ్వు గెలిస్తే వివరణ అక్కర్లేదు.ఓడితే వివరణ ఇవ్వడానికి అక్కడ ఉండకూడదు'-అడాల్ఫ్ హిట్లర్

పిల్లల్ని ఎలా పెంచుతున్నాం?

2010-08-24T23:28:00.000-07:00

ఇటీవలి కాలంలో పత్రికలలో , టీవీల్లో వచ్చే వార్తలు చూస్తే భయం వేస్తోంది. డ్రగ్స్ , ఇతర మత్తుమందుల వాడకం ఎక్కువైందని ,ముఖ్యంగా హైదరాబాద్ లో ఈ రాకెట్లు పెరుగుతున్నాయని సమాచారం.ఏమైనా చెడు ఎక్కినంత త్వరగా మంచి ఎక్కదుకదా !మరి ఈ వాతావరణంలో మన పిల్లల్ని ఎలా కాపాడుకోవాలి?కుటుంబ వాతావరణం,చక్కని సంబంధాలు,ప్రోత్సాహం ...ఇవన్నీ కొంతవరకు పిల్లలను దారి మళ్ళకుండా కాపాడుతాయి నిజమే.కానీ అంతకు మించి మనకు తెలియని ప్రలోభాలు బయట వాతావరణంలో కాచుకు ఉంటాయి కదా!డబ్బు యావలో పడి కుటుంబానికి తగినంత సమయం ఇవ్వక డబ్బుతో దాన్ని కొనుక్కో వచ్చనేవారు చాలా మందే తయారయ్యారు ఈ మధ్య. తండ్రులకు,తల్లులకు పార్టీలు, ఫంక్షన్లు ఎక్కువైతే పిల్లలు ఎవరితో స్నేహం చేస్తున్నారో ఎలా తెలుస్తుంది?హైదరాబాద్ నగరంలో ఈ మధ్య పబ్బుల కల్చర్ బాగా పెరిగింది.కొన్ని పబ్బుల వద్ద ఏ టైములో చూసినా చిన్న పిల్లలు ,టీన్ ఏజ్ లో ఉన్న అమ్మాయిలు,అబ్బాయిలు చెట్టపట్టాలు వేసుకొని వెళ్ళడం కనిపిస్తుంది.అసలు వారి డ్రస్సింగ్ కూడా విచిత్రంగా గ్రహాంతర వాసుల మాదిరి ఉంటుంది.ఈ డబ్బున్న పిల్లల్ని చూసి వారి స్నేహమనే మాయలో ఇతర వర్గాల పిల్లలూ పడి చేతులారా తమకు తామే గోతులు తవ్వుకుంటున్నారు. ఎంతమంది అమాయక విద్యార్ధులు ఆత్మహత్యలకు పాల్పడటంలేదు ?పైకి ఎన్ని కారణాలు చెప్పినా ,అసలు కారణం ఇటువంటి ప్రలోభాలే.చాలా మంది కాలేజీ అమ్మాయిలకి,అబ్బాయిలకి స్నేహం ఒక ఫాషన్. ఇక ఇప్పటి వార్త మాధ్యమాలూ తక్కువ తినలేదు. నీతులు చెప్తూ బూతులు చూపిస్తున్నారు.ఇంటర్నెట్ ప్రలోభం మరోపక్క.అయితే ఇన్నిటి మధ్యా బాగా చదువుకొంటూ తమ లక్ష్యాల వైపు సాగిపోయే వారూ ఉన్నారు.వారి గురించి దిగులు లేదు.సాఫ్ట్ వేర్ ఉద్యోగాలు కూడా యువత పేద దారులు పట్టడానికి కారణమే.ఎక్కువ జీతం,వారానికి అయిదు రోజుల పని,మధ్యలో విదేశీ ప్రయాణాలు ...వీటితో మధ్యతరగతి యువత ఉక్కిరి బిక్కిరి అయింది.దాంతో లెక్కలేకుండా అయిపోయింది.వారాంతంలో క్లబ్బులు,పబ్బులు...అలవాటు అయ్యాయి.మొన్నటి మాంద్యం దెబ్బకి కొంతమంది నెల మీదికి వచ్చినా, ఇంకా చాలా మంది ఆ ఊబిలోనే ఉన్నారు.రాజకీయంగా,వ్యాపారపరంగా,హైదరాబాద్ అభివృద్ధి చెందడం మాట అటుంచితే,ఆయా వర్గాల పిల్లల అరాచకాలకు అంతులేదు. సినీ నటి ప్రత్యూష మొదలుకొని ఆయేషామీరా వరకు ఎందరు ఆడపిల్లలు ఈ విధంగా బలయ్యారో?అందుకే పిల్లల్ని ఒక కంట కనిపెట్టి ఉండండి. వారితో స్నేహం చేయండి.వారి స్నేహాలను గమనించండి.మంచి పౌరులుగా తీర్చిదిద్దండి.వారికి ఇవ్వాల్సింది కోట్లు కాదు. ఆత్మా విశ్వాసం,స్వీయ నియంత్రణ పెరిగే సలహాలు.

దేవుడితో నేను

2010-08-10T23:29:00.000-07:00

దేవుడు: హలో!నన్ను పిలిచావా?
నేను: నేనా? నేన్ను పిలిచానా?ఇంతకూ ఎవరు నువ్వు?
దేవుడు: నేను దేవుడిని.నీ ప్రార్ధనలు విన్నాను.దాంతో నీతో మాట్లాడాలనుకున్నాను
నేను: నిజమే,నేను ప్రార్ధిస్తాను.కానీ అది నా మానసిక ప్రసాంతత కోసం.ప్రస్తుతం నేను ఒక సమస్యతో తీరిక లేకుండా ఉన్నాను.
దేవుడు: ఏమిటంత తీరికలేని పని నీకు?చీమలు కూడా అంతే.ఒక్కక్షణం తీరిక ఉండదు తెలుసా?
నేను: ఏమో!తెలీదు.నాకయితే క్షణం ఖాళీ ఉండదు.జీవితం చాలా క్లిష్టంగా,ఎప్పుడూ పరుగు పెడుతున్నట్టే ఉంటుంది.
దేవుడు: నిజమే.పనివల్ల అలా ఉంటుంది.అయితే పని తాలూకు ఉత్పత్తి ద్వారా ఫలితమూ ఉంటుంది.పని సమయాన్ని మింగేసినా, ఫలితం చింతను దూరం చేస్తుంది.
నేను: అది అర్ధం అవుతుంది.కానీ ఆలోచనకు అందదు. అయినా నేను నువ్విలా చాట్ విండోలో ప్రత్యక్షమవుతావని అనుకోలేదే !
దేవుడు:నువ్వు సమయం చాలక పడే ఇబ్బంది చూసి సాయపదాలనుకున్నాను. ఈ నెట్ యుగంలో నీకు అనువైన చాటింగ్ ద్వారా వస్తే మేలుకదా అని ఇలా వచ్చా.
నేను: అయితే సరే గానీ నాకో విషయం చెప్పు. ఎందుకు జీవితం ఇంత కంగాళీ అవుతోంది?
దేవుడు: జీవితం గురించి విశ్లేషణ మాని,జీవిస్తూ ఉండు.అంతే.విశ్లేషణ ఏదైనా చిక్కుముడే.
నేను: అయితే ఎప్పుడూ విచారంగా ఎందుకు ఉంటాం?
దేవుడు: నిన్నటి గురించి ఆలోచిస్తూ నేడు పడే బాదే రేపు అవుతోంది నీకు.ఆ బాధకు కారణం నీ విశ్లేషణ. బాధ పడటం నీ అలవాటుగా మారింది.అందుకే సంతోషంగా లేవు.
నేను: జీవితంలో ఇంత అసంతి,అనిశ్చితి ఉంటే విచారించకుండా ఎలా ఉంటాం?
దేవుడు: అనిశ్చితి తప్పనిసరి.విచారించడం నువ్వు ఎంచుకున్నది.
నేను: కానీ ఈ అనిశ్చితి లో ఎంతో బాధ ఉంది కదా?
దేవుడు: బాధ తప్పనిసరి.దాన్ని అనుభవించడం నువ్వు ఎంచుకున్నావ్.
నేను: అయితే కోరో కోరి జనం బాధ అనుభవించడానికే ఎందుకు సిద్హపడుతున్నారు?
దేవుడు: వజ్రాన్ని సాన పెట్టందే మెరుపు రాదు. బంగారం కాలితేనే స్వచ్చం.మంచివారు పరీక్షలు ఎదుర్కొంటారు.కానీ బాధపడరు.ఆ అనుభవంతో వారి జీవితం మరింత మధురం అవుతుందే తప్ప చేదు ఎక్కదు.
నేను: అంటే అటువంటి అనుభవం ఉపయోగమా?
దేవుడు: అవును.అనుభవం కరకుగా ఉండే గురువు మాదిరి.ముందు పరీక్షలు పెట్టి తర్వాత పాఠాలు నేర్పుతుంది.
నేను: అయినా సరే, ఎందుకు అటువంటి పరీక్షలు ఎదుర్కోవాలి?ఏ సమస్యలూ లేకుండా ఉండకూడదా?
దేవుడు: మానసిక బలం పెంచే సాధనాలే సమస్యలు.వాటిని ఎదుర్కొని సాధిస్తేనే దేన్నయినా తట్టుకునే శక్తి వస్తుంది.ఏ సమస్యలూ లేకపోతె ఇది సాధ్యం కాదు.
నేను: నిజం చెప్పాలంటే, చుట్టూ ఇన్ని సమస్యలుంటే మేం ఎటు పోతున్నామో తెలియడం లేదు.
దేవుడు: అలా సమస్యను పైపైన చూస్తె నీకేమీ తెలియదు.కలలా అనిపిస్తుంది.అదే తరచి చూడు.తెలివి వస్తుంది.కళ్ళు చూపు ఇస్తే,హృదయం అంతర్నేత్రాలను తెరిపిస్తుంది.
నేను: ఒక్కోసారి సరయిన దిశలో వెళ్ళడం కన్నా, త్వరగా విజయం దక్కడం లేదన్న బాధ ఎక్కువనిపిస్తోంది. ఏం చేయాలి?
దేవుడు: విజయం ఇతరులు కొలిచే సాధనం.తృప్తి నువ్వు అనుభవించేది.ఇతరుల్ని కాలంతో పని చేయనీ.నువ్వు నీ పని చేసుకుపో.
నేను:కష్టాల్లో ఉన్నపుడు నేను ఏ విధంగా స్ఫూర్తి పొందాలి?
దేవుడు: ఎప్పుడూ ఎంత దూరం వెళ్ళాలని కాక, ఎంత వరకూ వచ్చామని చూడు.కోల్పోయినవాటిని కాకుండా, దక్కింది లెక్కపెట్టుకో.బాధలో ఉన్నపుడు ఎవరైనా "నాకే ఎందుకు"అనుకుంటారు.అదే సుఖంలో అలా అనుకోరు.ప్రతివారూ తమవైపు నిజం ఉండాలనుకుంటారు గానీ, నిజం వైపు నిలబదాలనుకునేవారు చాలా తక్కువ.
నేను: ఒక్కోసారి నేను ఎవరు,ఇక్కడ ఎందుకు ఉన్నాను అని నన్ను నేను ప్రస్నించు కుంటే జవాబు దొరకదే.
దేవుడు:నువ్వు ఎవరివని కాకుండా,ఎవరైతే బాగుంటుందని అనిపిస్తొందో ఆలోచించు.ఒక లక్ష్యం కోసం ఇక్కడ ఉన్నావని వెతికే బదులు లక్ష్యం ఏర్పరచుకో.జీవితమంటే అన్వేషణ కాదు.సృష్టి.
నేను:జీవితం అత్త్యుత్తమంగా సాగాలంటే..
దేవుడు:గతాన్ని విచారించకుండా తలచుకో.వర్తమానాన్ని ఆత్మవిశ్వాసంతో ఎదుర్కొ.భయం లేకుండా భవిష్యత్తుకు సిద్ధం గా ఉండు.
నేను: చివరి విన్నపం . ఒక్కోసారి నా ప్రార్ధనలు నువ్వు వినడం లేదేమో అనిపిస్తుందే?
దేవుడు: వినని ప్రార్ధనలంటూ ఉండవు.కొన్నిటికి తిరస్కారం సమాధానం.
నేను:అద్భుతమైన సంభాషణకు కృతజ్ఞతలు.
దేవుడు: భయం వీడి విశ్వాసం పెంచుకో.నీ సందేహాలను నమ్మకు.అలాగే నమ్మకాలను సందేహించకు. జీవితమంటే సాధించాల్సిన లెక్క కాదు. చేదిమ్చాల్సిన రహస్యం.నన్ను నమ్ము.జీవించడం తెలిస్తే నీ జీవితం ఆనందమయం .ఇక ఉంటా .బై.
(ఫ్రెండ్స్, నాకెవరో ఈ సంభాషణ మెయిల్ లో పంపారు.చాల నచ్చింది. మనమందరం అస్తమానూ చిన్న విషయాలకు కూడా బాధ పడుతూ,దేవుడిని తిట్టుకుంటూ,అడిగేస్తూ ,కడిగేస్తూ ఉంటాం. నిజంగా దేవుడు మన ముందుకు వస్తే ఎలా ఉంటుందనే చిలిపి ఆలోచనే ఇదే.కానీ తరచి చూస్తె ఎన్నో సమస్యలకు సమాధానాలూ కనిపిస్తాయి.అనువాదంలో దోషాలకు , అక్షర దోషాలకు క్షమించగలరు.నా శక్తి మేరకు ప్రయత్నించాను.)

ప్రేమ-పెళ్ళి-తిండి

2010-08-10T04:17:00.000-07:00

ఒక అమ్మాయి,అబ్బాయి ఒకరినొకరు ఇష్టపడటానికి ఎన్ని కారణాలు ఉంటాయో,ఆ తర్వాత వారిద్దరిమధ్య మనస్పర్ధలకూ అన్నే కారణాలు ఉంటాయి.ఇందుకు కారణం-అప్పుడు ప్రేమలో ఉంటారు-ఎదుటివారిలో లోపాలు,తప్పులు అంతగా బాధించవు. ఒకవేళ తెలిసినా తరవాత తమ ప్రేమతో మార్చుకోవచ్చనే నమ్మకం ఉంటుంది.లోపాలతో సహా స్వీకరించడమే అసలైన ప్రేమ అంటారుగానీ, ఆనక వచ్చే తప్పొప్పుల చిట్టా తేలుస్తుంది ప్రేమ ఏ స్థాయిలో ఉందో.కొందరు మిత్రులు ప్రేమవివాహాల్లో ఆహారపు అలవాట్ల సమస్యలు ప్రస్తావించారు.వీటిని ఎలా పరిష్కరించుకోవాలంటే,అది ఆయా వ్యక్తుల పరిణతి,కుటుంబ వాతావరణం బట్టి ఉంటుంది. ప్రేమలో ఉన్నప్పుడు ఇవన్నీ చిన్న విషయాలే.అప్పుడు చుట్టూ ఎవరూ ఉండరు.ఒకరిని మరొకరు మెప్పించాలని ప్రయత్నిస్తారు.అంచేత సమస్యలుండవు.పెళ్ళి అనుకోగానే పెద్దలు,సాంప్రదాయాలు,...ఇంకా చాలా విషయాలు ముందుకు వస్తాయి.పెద్దమనసుతో పెళ్ళికి తలూపారనే ఆనందంలో పెద్దవాళ్ళు చెప్పిన వాటికి సరే అంటారు.అక్కడినుంచీ ప్రేమకు పరీక్షలు ఎదురవుతూనే ఉంటాయి. ఇవన్నీ వదిలేసినా,అసలు ప్రేమికుల్లో ఒకరు శాకాహారి(వెజిటేరియన్),మరొకరు మాంసాహారి(నాన్-వెజిటేరియన్) అయితె వారి మధ్య ఎటువంటి సమస్యలు రావచ్చో చూద్దాం. ఇందుకు నాకు తెలిసిన ఒక జంట గురించి చెప్తాను.

వాళ్ళిద్దరూ కాలేజీలో క్లాస్ మేట్స్.ముందు ఇష్టపడ్డారు.తర్వాత ప్రేమలో పడ్డారు.పెళ్ళికీ సిధ్ధపడ్డారు.అబ్బాయి అన్ని నాన్ వెజ్ వంటకాలూ తినే రకం. అమ్మాయేమో అమాయకంగా కనిపిస్తూ పప్పు,ఆవకాయ మాత్రమే తింటుంది. పొరపాటునకూడా మసాలా తినదు.వీరిద్దరూ పెళ్ళిచేసుకోవాలనుకున్నారు.వారి వారి ఇళ్ళలో చెప్పారు.అబ్బయి ఇంట్లో పెద్దగా అభ్యంతరం పెట్టలేదు.అమ్మాయి వాళ్ళ ఇంట్లో వద్దన్నారు.అమ్మాయికి అబ్బాయి వాళ్ళ అలవాట్లు భూతద్దంలో చూపించారు.అయినాసరే,'అతనే నా భర్తా' అందా అమ్మాయి.ఇంకేమిచేస్తం అనుకుని పెళ్ళి చేసారు.అమ్మాయి,అబ్బాయి కాపురం మొదలైంది.అంతకుముందే అమ్మాయి అతనిచేత మాంసం...వగైరాలు తినద్దని ఒట్టు వేయించుకుంది. అన్నాళ్ళూ ఏది పడితె అది కుషీగా తినే అతనికి ఆమె వండే వంటలు తినడం మొదట్లో సరదాగా ఉన్నా,రాను రాను ఇబ్బందిగా అనిపించడం మొదలైంది. అదీ కాక ఆమె వంటకాల గొప్పదనం చెప్పడం ఇంకా చిరాకు పుట్టించేది.ఏదన్నా హోటల్ కి వెళ్ళినపుదు తిందామా అంటె,ముఖం వికారంగా పెట్టేది.మెల్లగా ఆమెను,ఆమె వంటలను వెక్కిరించడం మొదలైంది.ఆమె కూడా అతని వంటలు,అలవాట్లు ఎత్తి పొడిచేది.ఎప్పుడైనా అత్తగారింటికి వెళ్ళినపుడు అక్కడ చికెన్ లాంటివి వండితే ఆమెకు ఒళ్ళు మండిపోయెది.దాంతో వెళ్ళడమూ మానేసింది.మెల్లగా కొన్నాళ్ళకు ఇద్దరూ రాజీ పడ్డారు.అతను ఒక్కడే బయటకు వెళితే తింటాడు.ఆమె కూడా పిల్లాడు పుట్టాక కొంచెం మారింది.ఇంట్లో కోడిగుడ్డు వండచ్చు.తనే ఆం లెట్ వెసేది. చూసారా మన అభిప్రాయాలు ఎలా మారిపోతాయో. కానీ,ఈ రోజుకూ ఆమె వెల్లుల్లి కూడా తినదు. అంటే,అభిరుచి మారలేదు.అభిప్రాయం మారింది అంతే.

మరో ఫ్రెండ్ మాంసాహారి. భర్త కూడా తింటారు. కానీ అత్త,మామ శాకాహారులు.వారు వస్తే కాయగూరలే వండాలి. వాళ్ళు ఉండే కొన్నిరోజులు చికెన్ తినక ఆమె ఎంత తిట్టుకునేదో,భర్తతో ఎంత గొడవ పడెదో. దాంతో ఆమెకు అత్తమామలపై కోపం.చివరకు వాళ్లని విడిగా పెట్టింది. అదీ ఆమె ఎంచుకున్న పరిష్కారం.ఈ సమస్యలు అందరికీ ఒకేలా ఉండవు.ఒకరితో మరొకరు సర్దుకుపొయే స్వభావాన్ని బట్టి ఉంటాయి. అయితే వీలయినంత వరకు మనవల్ల ఇబ్బంది లేకుండా చూసుకుంటే మంచిది.

-- పెళ్ళికి ముందే ఇష్టాలు-ముఖ్యంగా ఆహార విహారాల గురించి నిజాయితీగా చెప్పాలి.దీనివల్ల ఎంతవరకు ఒకరికొకరు సరిపోతారో(కంపాటిబిలిటీ) తెలుస్తుంది.

- పెళ్ళి అంటె కొంత సర్దుబాటూ అవసరమే.ఎంతసేపూ మనం కోరుకోవడమేకాదు.మననుంచి ఏం ఆశిస్తున్నారో కూడా గమనించాలి.వీలయినంత సహకరించాలి.

- వీలయినంతవరకు ముందే ఇరు కుటుంబాలవారితో మాట్లాడి, పరిస్థితులు అర్ధం అయ్యేలా వివరించాలి.

పెళ్ళికి ముందు...

2010-08-05T00:12:00.000-07:00

పెళ్లి అనగానే ఏం చూడాలి?ఈడు -జోడు,ఉద్యోగం-సద్యోగం, అటు -ఇటు ఏడుతరాలు ...ఇవి మాత్రమేకాదు.ఇంకా చాలా చూడాలి.ముఖ్యంగా అమ్మాయి,అబ్బాయి ఒకరిలో మరొకరు చూడాల్సినవి చాలా ఉన్నాయి.ఇద్దరూ కలసి మాట్లాడుకోవలసినవీ చాలా ఉన్నాయి.ఎందుకంటే, పెళ్లి జీవితంలో మేలుమలుపు కావాలి.సిగ్గు,భయం వంటి కారణాలతో ఏమీ మాట్లాడకుండా తలూపేయకూడదునిజాయతీగా,నిర్భయంగా కొన్ని ప్రశ్నలకు జవాబు చెప్పగలగాలి.అటువంటి కొన్ని ప్రశ్నలతో కూడిన క్విజ్ ఇక్కడ ఇస్తున్నా.
-పెళ్లి ఎందుకు చేసుకుంటున్నారు? అంటే, మీరు పెళ్లి చేసుకోడానికి నిజమైన రీజన్?
- పెళ్ళికి మీరు మానసికంగా సిద్ధంగా ఉన్నారా?(అన్నివిధాలా ఆలోచించి)
-మీరు,కాబోయే మీ భాగస్వామి కలసి ఈ విషయాలు మాట్లాడుకున్నారా?(పిల్లలు,ఆర్ధిక పరిస్థితి,ఉద్యోగాలు,నమ్మకం,కుటుంబాలు,స్నేహితులు,మతాలు (వేర్వేరు మతాలవారు )
-పెళ్ళికి సిద్ధపడడానికి మీ భాగస్వామి చెప్పిన కారణాలు మీకు నచ్చాయా? వారు మీ నుంచి ఏమి కోరుకుంటున్నారో తెలుసుకున్నారా?
-మీ అవసరాలు,కోరికలు (పెళ్లి నుంచి)గ్రహించారా? వాటిని కాబోయే వారితో చర్చించారా?
-అవసరమనుకుంటే మీ కోరికలను కొన్నిటిని త్యాగం చెయ్యగలరా? అవి ఏమిటి?
-ఇంటిపనులు, బాధ్యతల గురించి మాట్లాడుకున్నారా?ఎవరెవరు ఏ బాధ్యతలు పంచుకోవాలో అనుకున్నారా?
-ఇబ్బంది అనిపించినా విడాకుల పై అభిప్రాయాలూ తెలుసుకోవడం మంచిది.అంటే, వారి దృక్పధం తెలుసుకోవాలి.
-మీ ఇద్దరి దృష్టిలో భార్య/ భర్తగా విజయం సాధించడం అంటే ఏమిటి?
-తల్లిగా ,తండ్రిగా విజయం సాధించడం అంటే మీరు ఎలా నిర్వచిస్తారు?
పై ప్రశ్నలకు నిజాయతీగా సమాధానాలు చెప్పండి.మీ వివాహం సఫలం అవుతుందో,లేదో మీకే తెలిసిపోతుంది.

చుక్కలాంటి అమ్మాయి, చక్కనైన అబ్బాయి...

2010-07-29T03:47:00.000-07:00

అనగనగా ఓ అబ్బాయి,అమ్మాయి.చదువుకునే రోజుల్లో ప్రేమలో పడ్డారు.ఇద్దరి కులాలు వేరు.అయినా పెద్దలను ఒప్పించారు.పెళ్ళి చేసుకున్నారు.ఇంతవరకూ బాగానే ఉందికదా!సాధారణంగా కధలు,సినిమాల్లో ఇక్కడివరకే చూస్తాం. ఈ కధలోనే అనేక మలుపులు ఉంటాయి.చివరకు సుఖాంతం. కానీ నిజజీవితంలో పెళ్ళి తరవాతే అసలు సమస్యలు మొదలవుతాయి. భార్యాభర్తలు ఇద్దరికీ నిత్యజీవిత సమరం అవుతుంది.అన్నాళ్ళూ ఇద్దరూ ప్రేమలో మునిగిపోయి వారి బలాలు,బలహీనతలు చూసుకోరు.పైగా అంతవరకూ ఎటువంటి బాధ్యతలూ ఉండవు.అమ్మానాన్నలు అన్నీ అమరిస్తే హాయిగా ఉన్నారు.ఇప్పుడో, అన్నీ వీరే చూసుకోవాలి. ఇల్లు,ఉద్యోగం,సామాన్లు... ఒకటి కాదు. సరే,ఈ దశ కూదా
దాటారనుకుందాం. ఇంటిపనులు, బయటిపనులు...వీటిదగ్గర గొడవ మొదలవుతుంది.అది తనకు సంబంధం లేని విషయంలా అబ్బాయి,తప్పనిసరి తద్దినంలా అమ్మాయి కొత్తకాపురం మొదలవుతుంది.ఇద్దరూ ఉద్యోగాలు చేస్తుంటే సమస్య ఇంకాస్త పెరుగుతుంది.తానెందుకు పని అంతా చెయ్యాలని అమ్మాయి వాదన.దానికి అబ్బయి విచిత్రంగా చూసి,అదేదో ఆమె బాధ్యత అన్నట్లు మాట్లాడతాడు.వెంటనే ఆమె తనపై ప్రేమ లేదని అనేస్తుంది. చిత్రం యేమిటంటే,పెళ్ళికి ముందు గంటలు గంటలు మాట్లాడుకున్నా ఇంటి బాధ్యతలు,ఎవరెవరు ఏ పని చేసుకోవాలి, ఎలా కలసి సహకరించుకోవాలి అనే విషయలు ఉండవు. ప్రేమ పెళ్ళిళ్ళు అన్నిట్లో దాదాపు ఇంతే.ఇక గొడవలు మొదలయ్యాక ఒకరినొకరు అనుకునే మాటలు వింటే వీరేనా ప్రేమకోసం ఏదయినా చెయ్యడానికి సిద్ధపడింది అనిపిస్తుంది.ప్రతి విషయంలో పోటీ పడుతూ ,సవాళ్ళు విసురుకుంటూ ఉంటారు. వాదనలకోసం ఎంతసేపైనా కేటాయిస్తారు కానీ కూర్చుని మాట్లాడుకుని సమస్య పరిష్కరించుకుందాం అనుకోరు.ఈ సమస్యలు ప్రేమ పెళ్ళిళ్ళకే కాదు.పెద్దలు చేసే వివాహాల్లోనూ ఉంటాయి. పెళ్ళి చేయదానికి త్వరపదే పెద్దలు అమ్మాయి,అబ్బాయి అభిరుచులు కలిసాయా లేదా అనే విషయం పట్టించుకోరు. దానితో పెంపకాల తేడా వల్ల దంపతుల్లో అభిప్రాయభేదాలు వస్తుంటాయి. అందుకే ఎవరైనా సరె,పెళ్ళికి ముందే కొన్ని విషయాలు మాట్లాడుకోవడంద్వారా అనేక సమస్యలు నివారించవచ్చు. అలా మాట్లాడుకోవలసిన విషయాలేమిటో రేపు చూద్దాం.

ఎందుకలా మారిపోతాం?

2010-07-18T23:16:00.000-07:00

మనమందరం చిన్నతనంలో ఆడుతూ, పాడుతూ గడిపేస్తాం. అక్క, చెల్లి, తమ్ముడు ...అమ్మ,నాన్న..వీరే మన ప్రపంచం.మనలో మనకి ఎన్ని గొడవలున్నా మన అనే భావన ఉంటుంది.చదువులు,ఉద్యోగాల్లో పడ్డాక కొంత దూరం పెరిగినా, కలసినపుడు చిన్నపిల్లలు అయిపోతాం.కాని పెళ్లి అయేసరికి ఈ బంధాలలో చాలా మార్పు వస్తుంది.అన్నాళ్ళు చేయి పట్టి నడిపించిన నాన్న మాట నచ్చదు. అమ్మది చాదస్తం అనిపిస్తుంది.అసలు ఇన్నాళ్లుగా వీళ్ళతో ఎలా ఉన్నామా అని కూడా అనుకుంటాం.వాళ్ళపైన చిరాకు పడుతూ ఉంటాం. ఇక అన్నదమ్ములు,అక్కచేల్లెళ్ళలోఅసూయలు మామూలుగా ఉండవు.ఎవరో పరాయివారు, మనకి పడనివారు అన్నట్టు ఉంటాం.అందరూ అలాగే ఉంటారని కాదుగానీ , అనుభవంతో , చుట్టూ ఉన్న ప్రపంచాన్ని చూసి చెప్తున్నా మాట ఇది.పోనీ భార్యాభర్తలు అయినా అన్యోన్యంగా ఉంటారా అంటే అదే ఉంటే అందరితో గొడవలెందుకు వస్తాయి అనిపిస్తుంది. గొడవలు పడుతూ విడాకుల వరకూ వెళ్ళేవారు చాలా మంది ఉన్నారు.చిత్రం ఏమిటంటే, వీరంతా మధ్యతరగతివారే. బాగా డబ్బు ఉన్న కుటుంబాల్లో ఆప్యాయతలు బాగా కనిపిస్తాయి.ఒకరికొకరు సాయం చేసుకోవడమూ ఎక్కువే. కావాలంటే పరిశీలించండి, ఆర్ధిక ఇబ్బందులు లేని కుటుంబాల్లో మానవ సంబంధాలు బాగుంటాయని అర్ధం అవుతుంది.అదే మధ్య తరగతికి వచేసరికి ఎక్కడో గాడి తప్పుతోంది.తమ్ముడు తన కన్నా ఉన్నత స్థాయిలో ఉంటే అన్న ఒర్వలేడు. అన్న బాగుంటే తమ్ముడు చూడలేదు.అమ్మానాన్నలు ఆడపిల్లలతో బాగుంటే అదో అభద్రతా భావం. అక్క చదువుకుంటే చెల్లెలికి అసూయ. చెల్లెల్ని ఎవరైనా మెచ్చుకుంటే అక్క ఏడుపు.అంతేనా, ఇద్దరు ముగ్గురు పిల్లలు ఉన్నపుడు, వారిలో ఒకరికి పెళ్లి అయ్యాక , కాలం కలసి వచ్చి , డబ్బు వచ్చిందే అనుకుందాం. ఇక అదేదో తల్లిదండ్రుల తప్పు అయినట్లు వారిని నిందిస్తూ ఉంటారు కొందరు ఆడపిల్లలు.అంటే తమకు మంచి సంబంధం తేలేదని వారి భావన.అసలు ఏ తల్లిదండ్రులైనా అలా ఆలోచిస్తారా?తన అనే స్వార్ధం పెరిగిపోవడమే అన్నిటికి మూలకారణం.ఇది ఈ స్థాయికి చేరుతోందంటే, తన మూలాలనే నాశనం చేసుకునే తీరున సాగుతోంది. ఈ బాధలు చూసి కొంతమంది ఒక్కరే పిల్లలు చాలు అనుకుంటున్నారు.అన్నదమ్ములు, అక్కచెల్లెళ్ళు ....వారి పిల్లలు, అంతా కలుసుకోవడం, ఆనందాలు పంచుకోవడం తగ్గిపోయిందనే చెప్పాలి.ఒకపక్క సమాచార సాధనాలు ఎన్ని పెరిగినా, అవి మన హోదాకు, పరపతికి ఉపయోగిస్తున్నమే కాని, మనవారికోసం కాదు.ఇలా మానవ సంబంధాలన్నీ ఆర్ధిక సంబందాలయితే , కుటుంబ వ్యవస్థకు పెను సవాలే.మరి ఏమిటి పరిష్కారం?చిన్నతనం నుంచి పెంపకంలో తిండి-తిప్పలతో పాటు మంచి, మర్యాద,సేవాభావం,పెద్దలను గౌరవించడం,ముఖ్యంగా మానవ సంబంధాలను పెంచుకోవడం నేర్పాలి.లేకపోతె పిల్లలు మాకు నేర్పినదే ఆచరిస్తున్నాం అనే ప్రమాదం ఉంది. మార్పు కాలానికి అనుగుణంగా సర్దుకుపోవడం నేర్పాలిగాని, ఇంట్లోంచి బయటకు పోయేలా కాదు.ఏమంటారు?

హార్ట్ టు హార్ట్ ...

2010-07-14T02:55:00.000-07:00

అందరికీ నమస్కారం! నేను ప్రధానంగా ఫ్యామిలీ కౌన్సిలరును. కుటుంబంలో ఏవన్నా సమస్యలుంటే , అవి ఇంట్లో వారికీ చెప్పుకోలేనివి అయివుంటే , నాకు చెప్పచ్చు. వ్యక్తిగతంగా కలవలేని వారికోసం ఈ బ్లాగ్ ప్రారంభించాను.ఇందులో నేను కుటుంబాల్లో ఎదురయ్యే చిన్న చిన్న సమస్యల గురించి వివరిస్తాను. అవి అత్తా,కోడళ్ళ మధ్య కావచ్చు.భార్య-భర్తల మధ్య కావచ్చు. టీన్ ఏజ్ పిల్లలతో కూడా ఎన్నో సమస్యలు.అలాగే ఆఫీసుల్లో, చుట్టుపక్కల వారితో వచ్చే సమస్యలు కొన్ని.నేనేమి పరిష్కారాలు చెప్పను. తమకు తామే పరిష్కారం వెతుక్కోవచ్చు.వీలుని బట్టి కొన్ని కేసులు వివరిస్తాను.ఇది మనసుకు సంబంధించినది కాబట్టి ఈ పేరు పెట్టాను.మరి రేపు కలుద్దాం.